Vetrarævintýri í Japan

Þessi 15 daga vetrarferð um Japan inniheldur góða blöndu af stórborgum, hefðum og menningu, spennandi dagsferðum og heillandi vetrarstemningu. Ferðin hefst með fjögurra daga dvöl í Tókýó - einni stærstu borg jarðar. Gengið verður um hinn ævintýralega Yoyogi-garð og Meiji hofið heimsótt. Iðandi mannlíf í Shibuya og Harajuku mætir gamla hverfinu í Asakusa ásamt stórbrotnu útsýni yfir borgina úr 634 metra turninum, Tokyo Skytree. Þá skoðum við Keisarahöllina í Tókýó, ásamt Ginza, þekktasta verslunarhverfi Japans, og loks mun hópurinn upplifa stórbrotna listasýningu í Teamlab Borderless.

Því næst liggur leiðin til Kýótó, með japanskri shinkansen hraðlest, þar sem japönsk hof, bambusskógar og falleg stræti leika aðalhlutverk. Þá verður farin dagsferð til Ósaka að skoða kastalann og retró neon-hverfið í Shinsekai. Ferðin heldur svo áfram til Hírósíma, með viðkomu í Himeji-kastala og Korakuen-garðinum í Okayama. Í Hírósíma heimsækjum við Friðarminjasafnið og helgu eyjuna Miyajima.

Loks snúum við aftur til Tókýó þar sem boðið er upp á dagsferð til strandbæjarins Kamakura eða frídag fyrir slökun og verslunarferðir. Loks verður japanski fiskmarkaðurinn Tsukiji heimsóttur sem og skemmtihverfið Shinjuku. Þessi fjölbreytta vetrarferð býður upp á öðruvísi sýn á Japan - utan háannatíma eru færri ferðamenn á stjá og gaman verður að upplifa kyrrðina sem fylgir vetrinum.